Jan Łodzia, „Salve, salutis janua”

1a.

Salve, salutis janua

Solemnitas annua

       Tibi celebratur,

1b.

Flosculus sanctitatis,

Dies solemnitatis

       Per te iteratur.

2a.

Cum jam sis assumpta,

Resumpta

       Ad coeli palatia.

2b.

Jam rimaris cuncta

Conjuncta

       Semota fallacia.

3a.

Natus decoravit,

Ornavit,

       Sic ipsam disposuit,

3b.

Ut coeli reginam,

Dominam

       In throno suo posuit.

4a.

Quidam ipsam dubitant,

Asserere haesitant

       Corpore assumptam,

4b.

Sed est incredibile,

Immo impossibile

       In terra sepultam.

5a.

Cum sit thronus regius,

Thalamus egregius,

       In quem rex declinavit,

5b.

Cur corrumpi debuit,

Quae domum Deo praebuit

       In qua se humanavit.

6a.

Corpus gloriosum

Multumque formosum

       Nullo modo putruit.

6b.

Regis angelorum,

Domini coelorum

       Quod hospitium fuit.

7a.

Absit, ut hoc credam

       quod pars sit putrida quaedam

7b.

Ventris virginei,

       quae manet aula Dei

8a.

Ipsam deprecemur,

Ut ibi locemur

       Cum ipsius nato,

8b.

Ubi regnat vere,

Nos velit fovere

       In regno beato.

Miss. ms. Capit. Cracoviens. 6. saec. 15 in. A. – Sequent. ms. Dom. Połkowski s. sign. saec. 15 ex. B. – 7a sqq. fehlen B.

Źródło:

Analecta Hymnica Medii Aevi X, wyd. Guido Maria Dreves, Lipsk 1891, s. 84-85.